असोसिएशन फॉर डेमोक्रॅटिक रिफॉर्म्स (ADR) ने बुधवारी सांगितले की, देशातील 6 राष्ट्रीय पक्षांनी 2022-23 या आर्थिक वर्षात त्यांचे एकूण उत्पन्न सुमारे 3077 कोटी रुपये जाहीर केले आहे. यात भाजपचा वाटा सर्वाधिक आहे.
भाजपकडे सुमारे 2361 कोटी रुपये आहेत. अहवालानुसार भाजपचे उत्पन्न सहा राष्ट्रीय पक्षांच्या एकूण उत्पन्नाच्या 76.73 टक्के आहे.
452.375 कोटींच्या उत्पन्नासह काँग्रेस हा दुसऱ्या क्रमांकाचा पक्ष आहे. एकूण उत्पन्नाच्या 14.70 टक्के काँग्रेसकडे आहे. भाजप आणि काँग्रेस व्यतिरिक्त बसपा, आप, एनपीपी आणि सीपीआय-एम यांनी त्यांचे उत्पन्न जाहीर केले आहे.
भाजपच्या उत्पन्नात 443 कोटींची वाढ झाली आहे
ADR नुसार, भाजपचे उत्पन्न 23.15 टक्के किंवा 443.724 कोटी रुपयांनी वाढले असून ते आर्थिक वर्ष 2021-22 मध्ये 1917.12 कोटी रुपयांवरून 2022-23 या आर्थिक वर्षात 2360.844 कोटी रुपयांवर पोहोचले आहे.
तर NPP (नॅशनल पीपल्स पार्टी) चे उत्पन्न 1502.12 टक्के किंवा 7.09 कोटी रुपयांनी वाढले आहे जे 2021-22 या आर्थिक वर्षात 47.20 लाख रुपयांवरून 2022-23 या आर्थिक वर्षात 7.5 कोटी रुपये झाले आहे.
त्याचप्रमाणे, AAP चे उत्पन्न आर्थिक वर्ष 2021-22 मध्ये 44.539 कोटी रुपयांवरून 91.23 टक्क्यांनी (रु. 40.631 कोटी) वाढून आर्थिक वर्ष 2022-23 मध्ये 85.17 कोटी रुपये झाले.
काँग्रेससह तीन पक्षांचे उत्पन्न घटले
आर्थिक वर्ष 2021-22 आणि आर्थिक वर्ष 2022-23 दरम्यान, काँग्रेस, सीपीआय (एम) आणि बसपा यांच्या उत्पन्नात अनुक्रमे 16.42 टक्के (रु. 88.90 कोटी), 12.68 टक्के (रु. 20.575 कोटी) आणि 33.14 टक्के (रु. 14.508 कोटी) घट झाली आहे.
काँग्रेस आणि आपने उत्पन्नापेक्षा जास्त खर्च केला
भाजपने आर्थिक वर्ष 2022-23 मध्ये एकूण उत्पन्न 2360.844 कोटी रुपये असल्याचे घोषित केले, परंतु एकूण उत्पन्नाच्या केवळ 57.68 टक्के म्हणजे 1361.684 कोटी रुपये खर्च केले.
काँग्रेसचे एकूण उत्पन्न 452.375 कोटी रुपये होते, तर त्यांनी 467.135 कोटी रुपये खर्च केले होते, या वर्षीचा खर्च त्यांच्या एकूण उत्पन्नापेक्षा 3.26 टक्क्यांनी जास्त होता.
सीपीआय(एम) चे एकूण उत्पन्न 141.661 कोटी रुपये होते तर त्यांनी 106.067 कोटी रुपये खर्च केले, जे त्यांच्या उत्पन्नाच्या 74.87 टक्के होते.
त्याचप्रमाणे, आपचे एकूण उत्पन्न 85.17 कोटी रुपये होते, तर त्यांनी 102.051 कोटी रुपये खर्च केले. ही रक्कम पक्षाच्या एकूण उत्पन्नापेक्षा 19.82 टक्के अधिक होती.